Alli Gseen Schwarz

 

S Joor 2024 wird gschryybe,

wo isch die Zyt denn nume blyybe?

Hüt, wos nume no negativi Schlagzyyle git,

sin mir froo, s isch wiider Fasnachtszyt.

 

Dr Grieg uff dr ganze Wält,

wenn dr Putin wiider umebällt.

Mir sin uns sicher do drbyy,

das muess also wirgglig nit syy.

 

D Spidääler schryybe roti Zaale,

d Notufnaam kasch gar nym zaale.

S Pfläägepersonal lauft uff dr letschte Rille,

ainewääg zaige sii grosse Wille.

 

D Credit Suisse die hets glipft,

isch jetz zu dr UBS ghipft.

Jo es isch eso, s isch e Gruus,

jetzt isch wirgglig Änd und Uus.

 

Es isch nym wie friener, gheert me saage,

me schimpft und duet iiber vyles glaage.

Und goot me nume mol bitzeli in sich yne,

duet ufaimool doch e Huffe guets erschyyne.

 

Doch jetz, mir hoole uus,

kunnsch ufaimool au bym FCB nym druus.

Dr Dääge wenn er wiider tobe duet,

isch er für dr FCB no guet?

 

Ob Rahmen, Schultz oder Frei,

au dr FCB isch jetz "Vogelfrei".

Es gseet jetz uus, in de letschte Wuche und Dääg,

me isch allwääg wiider uff em richtige Wääg.

 

Basel jublet, es isch woor,

s isch basiirt noch 64 Joor.

Mir hän e neue basler Bundesroot,

er muess jetz hälffe in dere Not.

 

Au dr EHC isch guet druff,

het jetz au nümm so e Buff.

Wenns so wyter goot bym Dääge sim Gefasel,

isch dr EHC au glyy d Nummere 1 in Basel.

 

Doch in dere schwere Zyt,

isch s ainzig wo uns blyybt,

voorwärts und in d Zuekunft z bligge,

und drbyy s Postive use z pigge.

 

Jetzt isch aber gnueg mit glaage,

mir stön wiider uff em Waage.

Und so isch es, es isch ebbe Digg,

Fasnacht du bisch unsere Liechtbligg.