20 Joor Basel Tattoo

Wenn dr Oobehimmel rot isch,

Und am blaue Rhy no Lyyt driffsch,

Jo denn waisch de bisch in Basel,

Wo s Basel Tattoo vor 20 Joor geboore isch.

 

Mir schryybe s Joor Zwei Dausig und Säggs,

Ganz Basel isch scho an Barfi underwäggs.

Aber denn die 93. Minute im Joggeli – alli Dräum verreggt,

Usschrittige und Grawall – d Schand vo Basel isch perfeggt.

 

Nur e Mooned spöter luegt d Schwiiz an gliche Oort,

Zem richtige Zytpunggt gits e kulturelli Antwoort.

Dr Tiefpunggt vo Basel isch vrbyy,

In dr Stadt töönt blötzligg e ganz spezielli Meloodyy.

 

Uff dr Kasärne hörsch Drummle wie Härzschlaag im Taggt,

Seesch Uniforme glänze, jede Schritt isch exaggt.

Es isch d Premieere vom Basel Tattoo,

Gründet vo dr Top Secret Drummler Crew.

 

Joor fiir Joor findet das Speggtaggel statt,

Basel verwandlet sich für e paar Dääg zur Militäärstadt.

Faane in dr Luft, d Patrouille Suisse iiber em Rhy,

Jeerlig sin 70 Tausig Mensche drbyy.

 

Mit Drummler klai gstartet, inzwüsche ganz gross,

S Basel Tattoo wird mee und mee famoos.

Duudelsägg us Schottland sind wie allewyyl e Hit,

Es isch die zweit greescht Militäärbarade wos git.

 

Sit 2009 gheert au d Basler Garde zem Rituaal,

Sie begriesse d Gäscht und Formazioone vo überall.

In schwarz-wisser Unifoorm stöön sie vor em Kasäärne Toor,

Drumm traage mir unser Goschdyym mit viel Stolz in däm Joor.

 

In e baar Monet duet s Basel Tattoo also jubiliere,

D Quer und Chrüz Fäger dien das jetzt scho zelebriere.

Mir fraie uns uf alles wo no kunnt und blyybe ganz Oohr,

Härzliggi Gratulation und alles Gueti fiir die neggschte 20 Joor.