QuCW goes QCF

D Quer und Chrüz Fäger (QCF) sind im Summer 2017 im QCF-Cliquekäller gründet worde. Es git uns eigentlich scho bitz länger, eifach unter anderer Konstellation. D QCF resultiere nämlich usere Fusion vo de Pischtefäger us Basel und de Quer und Chrüz Waggis (QUCW) us Kaiseraugst.

D Pischtefäger beriichere d Basler Fasnacht scho sit em Joor 1962. Sie sind damals im Joor 1961 vo 7 Fasnächtler, wo alli am Flughafe Basel-Mulhouse gschafft händ, gründet worde. Dr hütigi QCF-Cliquekäller an dr St.Johanns-Vorstadt 11 isch sit 1974 sDehei vo de Pischtefäger gsi. Am Ahfang hän d Pischtefäger no Pfyffer und Dambure ka, ab 2007 aber nur no als Waageclique fungiert. Immer schwieriger isches worde, neue Nochwuchs  zfinde und so sind die junge und motivierte Quer und Chrüz Waggis us Kaiseraugst dezue gstosse.

D QUCW sind im 2010 in Kaiseraugst gründet worde. Damals hän sie innerhalb vo knapp einehalb Monet dr erschti kleini Waage uf d Bei gstellt. Dr Name isch ufgrund vo de verschiedene Nationlitäte in dr Clique und ufgrund vomene Dütschfehler vo eim vo de Schwizer entstande. Bis zu dr Fusion händ d QUCW nur an de Fasnachtsumzüg uf em Land teilgnoh. Näbe Kaiseraugst sind au jedes Joor d Umzüg in Prattele und Allschwil uf em Programm gstande. Joor für Joor isch aber d Sehnsucht, au emol an de "Drey scheenschte Dääg" in Basel dörfe mitzmache, grösser worde.

Glücklicherwiis hän sich die zwei Clique gfunde. D Traditione und Erinnerige vo de Pischtefäger wärde eso unter anderem im Cliquekäller erhalte bliibe und d QUCW dörfe in Zuekunft ihri Liideschaft au in Basel usüebe.

Mir, die neue Quer und Chrüz Fäger, freue uns sehr euch in Kaiseraugst, Allschwil und in Basel an dr Fasnacht ahzträffe. Und wenn grad nit Fasnacht isch, denn isch dr Träffpunkt in unserem traditionsriiche Cliquekäller in dr St.Johanns-Vorstadt 11.