Kasch no in Spiegel luege!?

 

Spieglein, Spieglein an dr Wand

wär isch dr greeschti Hiichler im ganze Land?

 

Lueg di mol im Spiegel aa,

du "ach so stargge" Maa.

Und du di au,

du "ach so perfeggti" Frau.

 

Aber wär isch dr greeschti Hiichler wär,

villicht bisch es au du, als they/them nonbinär?!

Öb du au so öbber bisch, wo so schiinheilig isch,

seesch wenn de d Antworte uf unseri Frooge gisch:

 

Bisch im ächte Lääbe brav und zivyyl,

aber verbraitisch uf Social Media Hass mit dim Fake Profyyl?!

Postisch Bilder, perfeggt inszeniirt,

aber zeigsch nie, was im ächte Läbe passiirt?!

 

Forderisch für dini Privatsphääre mee Schutz,

aber verkaufsch di im Internet für e paar Stutz?

Wünschisch dir e Beziehig mit Vertraue und Treui,

aber betriigsch sälber bi dr erschte Meeglichkeit ohni Reui?!

 

Schreisch lut «weniger isch mehr»,

aber stapple sich d Zalando Päggli wie Sand am Meer?!

Duesch ständig über s Klima flueche,

aber bisch scho dr näggschti Flug am bueche?!

 

Meggerisch, dass d Bolitigg nyt bringt,

aber fäälsch, wenn dr Uurnegang winggt?!

Schämmsch di, wenn dr Trump bi de USWaale siigt,

aber fraisch di, wenn dini Aktie stiigt?!

 

Stoosch zu Vyylfalt und Integration,

aber urteilsch nach Huutfarb und Religion?!

Zeigsch mit dim Finger wit wit wägg,

aber druggsch di vor dim eigene Drägg?!

 

Die Doppelmoral isch truurig aber woor,

drum halte mir dir dr Spiegel vor!

Mir sage syg nit wie de wottsch,

sondern überlegg dir, was du an dir ändere sottsch.